Ramkomh Cozah nih Myanmar ramchung Ramkulh le Ramthen diklak harsa mi asiloah nifatin tangka luut a ngei lo mi hna May 15 thok in tangka fang thenhphawt ding ti mi a fiang kho taktak rih lo, tiah May 13 ah kan theih.
“Hi kong hi ca cu a phan cang. May 15 thok in thenhphawt ding ti a si. Asinain, nihin tiang ah fehternak ca a phan lo. Tangka zeizat cio thenhphawt ding ti mi zong a fiang rih lo. Cun, nifatin tangka luut ngei lo kan ti tik ah zeibantuk minung theng dah thenhphawt an si lai, ti mi zong a fiang rih thiamthiam lo. Asinain, Ramkomh Cozahpi nih ca a kan kuat mi a si ko i an tuah ko lai. A nicaan le a zat a fian rih lo ca ah a si ko,” tiah Chin Ramkulh Cozah Social Affairs Minister Pu Pau Lun Min Thang nih The Hakha Post ah a chim.
Ramkomh Cozah nih harsa bawmhnak phun 5 in a voi khatnak bawmhnak a pek cang i atu a voi hnihnak cu tangka fang in bawmhnak pek a timh than nain a nicaan, a zat le zeibantuk minung bawmh ding a fiang rih lo, tiah kan theih.
