CDF-Matupi Brigade (1) hruainak in Matupi peng mizapi ukhruaitu bu an dirhmi kong he pehtlai in CDF-Matupi Brigade (2) nih July 28 ah duhlonak cathanh a chuah, tiah thawng kan theih.
Matupi peng mizapi ukhruaitu bu thar cu July 20 ah khan CDF-Matupi Brigade (1) hruainak in an dirh i, Chin Brotherhood le ICNCC nih a kalpimi ramkhel ningcang in kan kal lai, tiah a thanh.
Cu kong he pehtlai cun CDF-Matupi Brigade (2) nih, “Atu bantuk in mi tlawmte nih Matupi peng ukhruaitu bu thar an dirh tik ah hin 2022 November 6 ah zapi hnatlaknak in kan rak sermi Matupi peng ukhruaitu bu i nawlngeihnak kha hramhram in an chuh bia a si. Hi ukhruaitu bu an dirhmi cung ah hin duhlonak kan langhter,” tiah cathanh an chuah.
Cu lawng si loin, SAC ralkap an um ti lonak Matupi-Paletwa lamcung i khuate hna ah le Matupi peng chung ramlak ah AA, Chin Brotherhood le CDF-Matupi Brigade (1) nih raal lam pehtlai in an sialmi hi a rannak in kan ngolpiak u, taih CDF-Matupi Brigade (2) nih a langhter chap.
