Matupi khua hrambunh SAC ralkap nih Matupi peng chung ah raal lam sial in an nam caah Thlangpang khua tel in a tlawm bik khua nga cu ramlak ah an zaam i, eidin tirawl le sii-ai rianrang in an herh tiah theih a si.
Thlangpang-A, Thlangpang-B, Haltu, Ramting le Hmuntung khua in khuami 1200 hrawng cu khua chuah taak in ramlak ah raal an zaam. Ralzaam chung ah tar le ngakchia tampi an i tel i bawmhchanh an herh tiah theih a si.
“February 1 ah SAC ralkap nih raal lam sial in an rak nam hna caah zei hmanh la manh lo in an zaam caah tirawl le sii-ai rianrang in an herh,” tiah Matupi Peng Rammi Ukhruainak Phu in tuanvo ngeitu nih Khonumthungn ah a chim.
Thlangpang-A le Haltu khua in a zaam mi hna cu hmun khat ah an i fon i, khua dang in ralzaam hna zong ramlak ah deu sa in raal an zaam tiah theih a si.
Thlangpang khua cu inn 70 deng khuasa an si i IB-304 SAC ralkap battalion in ralkap 200 hrawng nih February 1 ah an rak luhhnawh. Inn 38, rawlruk 1 le caruk inn pakhat an khangh, thilri tampi an fir leng ah khuami thilri tamp an hrawh ta tiah Matupi Peng Rammi Ukhruainak Phu sin in theih a si.
Atu ah cun SAC ralkap pawl cu khuate in Facang, vok, ar, inn zuat zatil hna le thilri an fir hna hnu ah an kir cang nain ralzaam pawl tu cu an khua lei ah an kir ngam rih lo tiah theih a si.
