Matupi peng ah a cang mi kahdohnak ruang ah Matupi khuapi in le khuate paruk hrawng in a zaam mi ralzaam 2,000 hrawng nih eidin le sii-ai bawmhnak an herh, tiah theih a si.
Ralzaam zohkhenhnak lei ṭuanvo ngeitu pakhat nih, “Ralzaam pawl hi ramlak le tlangcung lo pawl ah an um caah an ṭhutdirnak caah muka zong a herh. Cu lawng si lo in raifanh zawtnak zong a um caah sii-ai zong an herh ngaingai,” tiah a chim.
Ralzaam hna caah eidin tirawl cu kiangkap mi hna nih an bawmh hna i, a lenglei in zei bantuk bu hmanh nih bawmhnak an pe hna lo.
Matupi peng chung ah AA nih bomb rap pawl an chiah caah tualchungmi aa hliam mi an um lawng si lo in AA nih mi cheukhat zong an tlaih hna, tiah tualchungmi pakhat nih a chim.
Tualchungmi pakhat nih, “Nihin ah AA bomb rap ruang ah minung pakhat aa hliam. Mizapi umkalnak kiangkap ah AA nih bomb rap pawl an chiah hna. Tualchungmi pathum zong AA nih an tlaih hna. Cun, tualchungmi pakhat zong meithal in an kah i hliamhma a pu,” tiah a chim.
Matupi le Paletwa karlak ah AA nih an chiah mi bomb rap ruang ah CDM sianginn saya pakhat le tualchungmi pahnih hliamhma an pu cang, tiah theih a si.
