Matupi peng chung mizapi lak ah zatuak in 90% hrawng nih hin Matupi peng chung ah AA ran rak luhmi an duh lo, tiah Matupi hruaitu upa hna nih an chim.
Mizoram, Lawngtlai khua ah Chin ralzaam hna nih AA duhlo langhternak an tuah i, cuka hmun ah aa telmi Matupi lei hruaitu hna nih a cunglei bantuk in an chim hi a si.
Lamzawhnak ah aa telmi Matupi lei hruaitu pakhat nih, “Arakan Army a sawmtu hna hi Matupi mizapi tam deuh nih an cohlang hna lo. Zatuak in 100% ah 10% hrawng lawng nih AA an cohlan. A dang 90% nih Arakan Army kan duh lo, kan cohlang lo. Chinland Council hi kan cohlan,” tiah a chim.
Matupi ralzaam hna hruainak in August 10 ah khan Lawngtlai khua CYLA cerhtual ah Chin ralzaam hna nih AA duhlo langhter an tuah in, Matupi, Hakha, Thantlang, Paletwa le hmun dangdang in Lawngtlai ah ral a rak zaammi minung 700 in 1000 karlak an i tel.
Matupi ralzaam hruaitu pakhat nih, “Duhlonak kan langhternak i kan i tinhmi cu Chinram in a rianrannak in AA a chuah nakhnga hi a si. Matupi peng sining zoh tikah Kala khua, Lasing khua, Vualangte khua, Vualangpi khua ah AA nih hmunhma an laak. Khuami zong ralzaam in an um. Khuami meithal in an kahmi hna zong an um. AA bomb ruang ah khuami kebul mi zong an um. Cheukhat khua ah leițuan ding in a kalmi Nu an tlaih hna, an thlah ṭhanmi hna zong an um. Mizapi nih ṭih ding in an um pin ah nuhrin covo an buarmi zong a um. AA ralkap an umnak ah khuami an zaam dih,” tiah a chim.
Matupi siseh, Paletwa zong ah siseh, SAC ralkap an um ti lo nain nihin ni tiang kan kir ngam lonak cu AA an um ruang ah a si, tiah a chim chap.
Lawngtlai khua ah hin Matupi, Hakha, Thantlang, Kalay le Paletwa lei in Chin ralzaam 5000 in 7000 karlak an um i cu chung ah cun zatuak in 90% hrawng hi Matupi ralzaam an si hna, tiah thei a si.
