Paletwa peng, Sami khua TOC camp in a rak zaam mi SAC ralkap hna le CNA, CDF-Paletwa, CDF-Matupi phukomh kar kahdohnak ah SAC ralkap 10 an thi i tampi hma an pu tiah CDF-Paletwa nih nihin, January 30 ah a thanh.
January 20, zinglei sml. 10:00 hrawng ah Matupi peng, Lungpang khua pawng Kapin tiva ah SAC ralkap 200 hrawng cu CNA, CDF-Paletwa le CDF-Matupi phukomh nih an kah hna. Cu kahdohnak ah cun SAC ralkap pasarih an thi, 10 hrawng hma an pu tiah cathanh ah an tial.
January 21 ah Matupi peng, Cangtak khua ah a voi hnihnak an i kap than i SAC ralkap pathum an thi, tampi hma an pu. Chin ralkap phukomh lei cu aa hliam mi um lo tein hnulei an kir kho tiah an langhter.
Cun, Paletwa peng, Bunglai khua ah CDF-Paletwa, Eagle battalion in ralkap pahnih cu Sami TOC camp in a rak zaam mi SAC ralkap nih January 16 ah an tlaih hna i, pakhat cu a rak zaam kho ti zong CDF-Paletwa cathanh ah an langhter.
Photo: CDF-Paletwa (Hmanthlak hlun a si)
