Matupi peng chung in Rakhine miphun hriamtlai AA chuah ding in “Global Matupi CDF Supporting Committee” nih nizan July 7 ah halnak a tuah, tiah thawng kan theih.
“Matupi peng ah AA nih ralkap thazaang chapnak, ralkap sakhaan thar sernak, sualnak ngei lo tualchungmi tlaihkhihnak le innzuat saṭial thahnak an tuah mi pawl hi Global Matupi CDF Supporting Committee nih kan duh hrimhrim lo,” tiah an langhter.
Cucaah, Matupi peng chung in AA hriamtlai pawl nan chuah nakhnga Global Matupi CDF Supporting Committee nih kan in nawl hna, tiah nawlnak an tuah.
AA hriamtlai hruainak in June 29 ah Matupi khua an laak i, AA nih Matupi peng chung ah ralkap thazaang chapnak, sakhaan thar sernak le tualchungmi hna cung ah nuhrin covo buarnak pawl a tuah caah Chinland Council ralkap hna he zong Matupi peng ah kahdohnak a chuak, tiah thawng kan theih.
