CDM tuah lo in ral a zaam mi SAC kut tang zung rianṭuan pawl cu Matupi peng chung hmunhma cheukhat ah hriamtlai bu hna nih dornak nawl an pe hna lo, tiah theih a si.
Matupi khuachung ah kahdohnak a chuak lai ti mi thawngpang a len bantuk in mi tampi nih Matupi khua an chuahtak i Mizoram le Matupi peng chung khuate pawl ah an zaam hna.
CDF-Matupi Battalion (5) hmunram ah cun Matupi in a zaam mi Non-CDM pawl cu tangka ting 10 MMK dan an tat hna i, hmun dang ah an kalter hna.
Ral a zaam mi Non-CDM pakhat nih, “Kanmahle rank ning cio dantatnak tangka kan liam. Kannih hi CDF-Matupi Battalion (5) ah dantatnak tangka ting 10MMK kan liam. Asinain, dornak nawl a kan pe lo,” tiah a chim.
Non-CDF pawl dornak a pe lotu an um bantuk in dantat hnu ah dornak nawl petu zong an um ve. CDF-Matupi Battation-3 (Kaisi Battalion), Battalion-2 (Vakok Battalion) le Battalion-4 (Lisan Battalion) nih cun dantatnak tangka an liamter hna i dornak nawl an pek hna, tiah theih a si.
