Chin Ramkulh, Matupi le Tonzang ah Yangon le India in a tlung mi COVID-19 mizaw minung pathum hmuh an si tiah thawng kan theih.
Hi mizaw hna hi Ramkomh Ngandamnak le Zaanglek Zung nih, Matupi ah minung pahnih, Tonzang Peng ah minung pakhat hna an si tiah a thanh. Matupi i zawtnak hmuh mi pahnih hna hi nupa an si. An pa hi thi cancer zawtnak a ngei mi a si ca ah, Yangon ah an kalpi. Yangon lei nih an kirter than hna i,Matupi sii-inn ah Quarantine in chiah an si. Quarantine in Matupi sii-inn an um lio ah a pasal cu thi cancer zawtnak in a thi tiah kan theih.
Hi kong he pehtlai in Matupi sii-inn uk Dr. Thit Lwin Thein nih, “Atu zawtnak hmuh mi chung in a pasal hi thi cancer zawtnak a ngeih ca ah Yangon lei ah an i piah. Yangon lei in an rak kir hnu ah Matupi sii-inn ah Quarantine in chiah an si. Matupi an phaak hnu ah a ngandam lonak hi a zual i September 29 zaan ah a nunnak a liam. A thi kan laak i swab test kan tuah tik ah positive a si. Cun, amah a zohkhenh tu le a cepkeng tu an nu zong positive a si ve,” tiah The Hakha Post ah a chim.
Matupi Peng ah zawtnak hi a voi khatnak hmuh a si. Runvennak ca ah erhkhumh mi dihlak minung 30 an si i, hi hna zong hi voi khat an zawtnak chek an si cang i nihin tiang ahcun negative an si tiah kan theih.
Cun, Tonzang Peng mizaw kong he pehtlai in, Sister Zaam Cing nih, “Tonzang Peng mizaw hmuh mi hi India ram in a rak tlung mi nungak kum 20 a si. India in a rak tlun le cangka in Facility Quarantine ah chiah mi a si. Tedim sii-inn ah zohkhenh a si,” tiah The Hakha Post ah a chim.
Tedim Peng chung ah erhkhumh mi mizaw minung 15 an um tiah, thawng kan theih.
Photo/ Internet
