Matupi le Mindat peng chung khua 13 ah pawfah zawtnak in minung 11 an nunnak a liam, tiah Mindat peng ah rian a ṭuanmi sibawi pakhat nih a chim.
Cu sibawi nih cun, “Mindat peng ah hin minung 2 an thi i, Matupi lei ah minung 9 an thi tiin thawng kan theih,” tiah MFP thawngzamhnak ah a chim.
A nunnak a liammi hna hi kum upa lei an si hna i Mindat peng le Matupi peng khua 13 ah pawfah zawtnak a tuarmi minung 1000 leng an si, tiah a chim chap.
“Pawfah zawtnak in a thimi hi kum upa lawngte an si hna. Asinain, kum 8 ngakchia pakhat zong aa tel ve. Kan theih bantuk in hika lei hi cu ahlanlio pi in ngandamnak lei ah an rak daithlah ngaimi hmunram a si tik ah ngandamnak lei theihhngalhnak hi an chambau ngai,” tiah a cunglei sibawi nih a chim chap.
Matupi peng khuate 11 le Mindat peng khuate 2 ah atu bantuk in pawfah zawtnak a tlun hi a si, tiah MFP nih a langhter.
