Matupi ah SAC nih thong an thlak mi hna ramkhel thongtla minung 13 cu Matupi khua laak kahdohnak lio ah an zaam kho, tiah CDF-Matupi Brigade (1) nih nihin ah theihternak a tuah.
Hi ramkhel thongtla minung 13 hi kahdohnak lio ah SAC ralkap nih hliamhma a pu mi an ralkap pawl hmun khat hnu hmun khat ah thiar ding in rian an fial mi hna an si.
“Kahdohnak liopi ah hliamhma a pu mi SAC ralkap pawl thiar ding in hramhram in an fial hna. Cu lio ah cun an zaam kho. Tha te in kan zohkhenh ko hna. A dang thongtla pawl zong kan kawl cuahmah hna lio a si,” tiah CDF-Matupi Brigade (1) tuanvo ngeitu nih a chim.
Matupi khua ah thong an thlak mi ramkhel thongtla pawl cu June 6 ah khan palik sakhaan in Kha La Ya (140) SAC ralkap sakhaan an thial hna.
Autan a luat mi minung 13 chung ah hin SAC nih nunchung thong an thlak mi hna Salai Min Thang le Kyaw Thang Lian Aung zong an i tel, tiah theih a si.
