March thla chung ah SAC ralkap nih Chinram, Mindat peng chung ah vanlawng in kahdohnak voi 20 hrawng a tuah caah tualchungmi pali an nunnak a liam, tiah theih a si.
March 1 le 2 ah Mindat peng circle (13) ah SAC nih vanlawng kahdohnak a tuah i, March 8 le 22 ah circle (1), March 15 ah circle (3) le March 25 ah Chinram le Magwe ramri Mindat peng chung ah SAC nih vanlawng in kahdohnak a tuah hna.
Vanlawng kahnak ruang ah Mindat peng chung ah tualchungmi pali an nunnak a liam. A nunnak a liam mi minung pali cu: kum 40 hrawng a si mi nutung pakhat, kum 6 a si mi ngakchia nute le kum 30 hrawng a si mi pa pahnih an si.
Vanlawng kahnak ruang ah hliamhma a pu mi tualchungmi minung 5 an um pin ah biakinn, sianginn le inn 20 hrawng zong an rawkral.
Nihin April 1 zinglei sml. 1:50 hrawng zong ah SAC nih Mindat peng, circle (2) ah vanlawng in bomb voi 2 a thlak i, chun sml. 12:00 hrawng zong ah vanlawng pathum in circle (2) ah bomb voi 6 pehzul in a thlak chap.
Nihin vanlawng bomb thlaknak ruang ah Mindat peng, circle (2) ah a thi mi le aa hliam mi an um le um lo fiang in theih a si rih lo.
