Karen miphun hriamtlai KNLA le SAC ralkap pawl kar, a luan cia March thla chung kahdohnak ah SAC ralkap 400 leng an thi tiah KNLA Ralkap Hmunpi nih nizan April 14 ah a thanh.
A luan cia March thla chung KNU hmunhma chung ah SAC he kahdohnak voi 300 leng a chuak i SAC lei in 422 an thi, 200 leng hma an pu tiah cathanh an chuah.
Cun KNU Brigade-2 hmun a si mi Taungoo pengkomh chung ah KNLA le tangti phu hna nih ralhraang camp pawl an va kah, drone in bomb an va thlak ruang ah SAC lei a thi mi an tam tiah theih a si.
Brigade-3 hmun a si mi Nyaunglaybin pengkomh zong ah SAC ralkap nih raalhmai nam in an lut i, rammi inn le lo an hrawh ca ah SAC ralhraang hna le KNU kut tang KNLA ralkap hna kar ah March 1 in 19 tiang kah dohnak a chuak tiah KNU nih an thanh.
Cu bantuk thiamthiam in thla khat chung ah, Brigade-5 hmun a si mi Mutraw pengkomh ah kahdohnak 190 leng a chuak i SAC ralkap 92 an thi, 45 hma an pu. March 28 ah Mae Kha Hta SAC ralhraang camp laak kahdohnak zong ah SAC ralkap 16 an thi tiah KNU Brigade-5 cathanhnak in theih a si.
March thla chung KNLA le SAC ralhraang kar kahdohnak pawl ah KNLA ralkap lei in pasarih an thi i 31 hma an pu tiah KNLA cathanh ah an langhter. (Ref: KIC)
Photo: KIC
