India ram, Manipur ramkulh, Imphal thonginn ah an chiah mi hna Myanmar rammi pawl cu an luat caan a tling cang nain Rs. 50,000 pek lawng ah thlah nan si lai an ti hna, tiah India for Myanmar haotu Salai Do Khar nih Mizzima thawngzamhnak ah a chim.
“Thong a tla mi naihniam chungkhar nih hi kong hi fiang tein an chim. A dangdang pawl nih an chim mi he zong aa khat. Rs. 50,000 pek lawng ah thlah nan si lai an ti hna. Asinain, thongtla pawl he pumpak in kan i pehtlaih khawh rih lo caah zeitindah kan bawmh hna lai ti mi kan chim kho rih lo,” tiah Salai Do Khar nih a chim.
Manipur ramkulh ah phungning loin an lut tiin tlaih a tong mi pawl cu tangka liam ding in dantat an si pin ah Imphal thonginn ah an chiah hna.
Luat caan a tling a cang mi an um nain Myanmar lei kuatnak kong ah tlamtlinnak a um rih lo tiah an ti hna i, thonginn ah an hren rih hna, tiah chungkhar nih an chim.
Imphal thongtla Myanmar rammi pakhat i a nupi nih, “Tangka pek ahcun an thlah hna lai tiin an chim mi cu ka theih ve. Thonginn ah caansau an um cang caah chuah an duh ngai ve cang hna. Tangka pek le pek lo kong ah anmah he zong bia kan i ruah. Tangka liam hnu ah an luat taktak lai ti mi kan zum kho rih lo. Fiang tein hlathlai hnu ah tuah cio ding in midang zong forhfial ka duh hna,” tiah Mizzima sin ah a chim.
SAC nih Myanmar ram uknak an lak hnu ah India ram ah a zaam mi Myanmar rammi 200 hrawng hi Manipur ramkulh, Lamka khua le More khua ah an tlaih cang hna, tiah theih a si.
