Nihin Hakha peng, CNA Brigade 5 hmun chung kahdohnak ah SAC ralhraang a thi mi an tam i CNA le CDF phu komh nih raal hriamnam tampi an laak khawh tiah kan theih.
“Nihin kahdohnak ah hriamnam zun 11 kan laak khawh. Kanmah lei cu kan him” tiah raal ram thawng hram pakhat nih THP ah a chim.
Chin ralkap nih SAC hriamnam an laak khawh mi hna cu; MA meithal zun 9, RPG zun 1, 60MM mortar zun khat, kut cheh bomb 11, zenthong le a dang raal hriamnam pawl an si tiah kan theih.
Hi hlan deuh kahdohnak ah a rak thi mi ralhraang ruak paruk zong Chin ralkap nih an hmuh hna i an vui hna tiah kan theih.
Gangaw lei in Chinram ah a rak kai mi SAC Light Infantry Division-77 cu ram tang in an rak kai i Chin ralkap nih an bawh hna, an kah hna ca ah a thi mi le hma pu an tam tiah theih a si. SAC lei a thi mi zat tu cu fiang in hngalh a si rih lo.
Chuncung khua lei kahdohnak zong ah SAC ralkap a thi mi an tam i Chin ralkap nih a kaang rih lo mi SAC tank (Armored vehicle) pakhat kha nihin ah an va khangh tiah kan theih.
