Malaysia ram ah Myanmar ram mi chung in Chinmi ralzaam (refugee) tambik kan umnak hmun a si i Malaysia cozah hi a ra lai mi 2021 March thla asiloah, April thla ah thimnak ngei ding an si, thimnak ah teinak a hmutu cozah hruaitu thar nih ram an hruai ding le cozah an tlaih ding mi kong ah cheukhat Chinmi ralzaam (refugee) hna cu thinphannak tete an ngei tiah, kan theih.
Malaysia um Aanawl Zathang nih, “Hruaitu thar an kai ahcun thinphang a si ko. Ramdang mi huatnak hi a sang tuk caah um an kan sianh te hnga maw, asinain aho an tuan zong ah um a ngah te ko lai tiah ka zumh, USA ram zong hi a that ahcun UNHCR card a ngei mi caah cun ruahchannak a um ko nain card a ngei lo mi caah cun a fawi lo,” tiah The Hakha Post ah a chim.
Thangte nih cun, “Atu cozah zong an tha ko. Ramdang huatnak cu a tam ko, an chim zong a tam ko nain an tuah tak mi a um lo. Refugee lawng si loin riantuan mi hi 2 million hrawng kan si. Cucaah ramdang mi riantuan mi kha an tlaih hna, an ram ah an kuat than hna caah riantuantu an tlawm than lengmang nak a si. Tih awk cu ka thei lo. UN card ka ngeih lo caah ruahchannak cu a um lo,” tiah The Hakha Post ah a chim.
David zong nih, “Malaysia cozah nih phungthar an ser ahcun tlaihkhihnak ah kan tam deuh ko lai, a hlan nakin kan buai deuh ko lai, card a ngei lo mi caah cun thinphang chinchin a si ko,” tiah The Hakha Post ah a chim.
UNHCR kong he pehtlai in Malaysia-Myanmar tanzung riantuan Salai Jame Bawi Thang Bik nih, “Ram thumnak kal hi cu pumpak thilton (Individual case assessment) deuh a si. Atu Malaysia ah Chinmi ralzam in a um mi (refugee) UNHCR card ngei mi hna hi cu an dihlak in a lak hna lai ti cu chim awk a har ngai. Anmah refugee claim he aa pehtlai mi a si. An case kha ramt humnak kal ding ah an tlinh (qualify) ahcun an kuat colh ko hna lai, tiah The Hakha Post ah a chim.
UNHCR nih ralzaam refugee a auh ning cu, UNHCR nih a ngeihmi phung ning he aa tlak mi cu auh an si. Phung ning in um tonak, nun khuasaknak hmun a ngei set lo mi, asiloah taksa ngandamnak bawmhchanh a herh mi, harnak, thih le nun ri ah a um mi, dohnak, ngandamnak sii ai bawmh a herh mi, nu he aa pehtlai mi kong, innchungkhar hmunkhat um khawhnak, ngakchia kong, fimthiamnak le thil tikhawhnak a chambau mi kha bawmh a si.
UNHCR nih a zoh ning le refugee a lak ning cu pumpak case in a kal. Miphun, bu (group) innchungkhar tibantuk in a kal mi a si lo. Pumpak, mi pakhat nih a ngeih mi harnak thilton (case) kong zoh in, UNHCR nih a ngeih mi phungning tein, zulhphung vialte he aa tlak mi kha, lanh khawh le kal khawhnak pek an si.
A herhmi theihhngalhnak, ca, tuah awk thil, refugee he a pehtlai mi riantuan ding, refugee milu, refugee ralzaam pumpak pakhat nih a herh bik mi, a duh mi, a tuah khawh mi, UNHCR nih a zohkhenhnak tang ah a tuah khawh mi, cun, zatlangbu pakhat hrambunh in zohkhenhnak a ngeih khawh mi, rian a tuan nak in a hmuhmi tangka, um nak le a nunnak ah a rak ton mi harnak te pawl zoh in, fianghlang te le dikfel tein a chim kho mi hna kha, papek in UNHCR nih a zohkhenh i ram thumnak zong fawi tein lanhkhawh nak a pek mi a si.
United Nations High Commissioner for Refugees (UNHCR) ti mi cu United Nations nih 1951 kum ah a rak dirh mi, ramdang mi hartong, umnak ram tha tein a ngei lo mi, ralzaam kha ram thumnak ah um khawh ding ah zohkhenh ding le nun sersiam ding ah rak tuah mi a si, tiah kan theih.
