Covid-19 zawtnak ruangah phungning loin Malaysia ram ah rian a tuanmi Myanmar rammi hna cu Malaysia cozah nih riantuan khawhnak nawl a pek cang lai, tiah kan theih.
Tulio Malaysia cozah nih phungning lo in um mi ramdang mi hna phungning tein riantuan khawh nakding ah Malaysia cozah nih khua kan khan lai an ti mi kong he pehtlai in mizapi nih theih a herh tuk mi a si.
Hi kong he pehtlai in Malaysia Myanmar tanzung (Embassy) ah riantuanmi Salai Jame Bawi Thang Bik nih,“Mah thawngpang hi a lar tuk caah ramkhel lei le covo lei rian a tuan mi cheukhat upa hna he biaruahnak kan ngeih mi cu Sianginn dih lak March 2021 tiang khar an si i kan hnu ah cozah nih mizapi bawmhnak tiah an thanh mi kha an ram thimnak ca i chiah mi tangka an si, tu lio harnak caah bawmh duh ruang ah pek mi taktak a si lo.
Mah kong hi kan zoh tik ah aa pehtlai mi thil tampi a um. Tahchunnak ah JASA caah RM 81 Million cozah nih a hman, tulio PM kut tang ah special project caah 1 billion le Ministry of Finance caah RM 13.631 billion hman ding an timh tuah. Ramkhel lei in zoh a si ahcun mah thil hi hmai kum sianginn hon than hlan January si lo ah February ahcun election zong a si kho mi a si caah cozah nih minthatnak caah an tuah mi thil a si kho tiah zumh a si.
Cu hnu ah mah tangka pawl cu zeitik ah cozah nih a chuah lai i mizapi nih zeitik ah an ngah te lai. Aho pawl caah dah thatnak a chuahpi lai ti mi zong hi ruah ngai hau mi si. Khat lei ah kan theih chih ding mi cu ramdang mi le ralzaam hna kong ah hin cun Malaysia nih a duh lo ngai mi thil a si. Cucaah cun cozah nih phunning lo ramdang mi thatnak caah khua a ruat taktak hnga maw timi hi bia hal ding a um.
An chim ning ahcun phung ning lo um mi ramdang mi phung ning tein cohlannak le an ram ah kuat than khawh nakding khuakhan kan i tim an ti. Mah tiin phung ning lo ramdang mi hna phungning tein cohlan le riantuan ter khawh si hna seh law atu a cozah hi mizapi nih an duh ti lai lo ti cu a fiang. Cozah le PM nih mah tiin mizapi nih duh lo ding mi thil cu a tuah lai lo tiah a fiang, zei cah ti ahcun a ra lai ding mi election ah tei a duh ve lai. Mah khuakhannak zong hi an i timh cuahmah lio lawng a si i khat lei ah ramkhel lei mifim hna zong nih an ngiat cuahmah ve lio a si. Mah bantuk in cozah nih ramdang mi caah khuakhannak timi kong hi voi tamtuk kan rak theih cang ko nain Zeitik hmanh ah a tuah taktak kho bal lo, tiah The Hakha Post ah a chim.
Malaysia cozah nih aa tinh ning ahcun, pakhatnak ah phung ning lo riantuantu um hna hlah seh, ti a duh, cun, covid-19 zawtnak ruangah ramdang mi riantuantu auh khawh a si lo caah, phung ning loin a um mi pawl kha, phung ning in an tuan khawh nakding ah a tuah mi a si, a hlei in 3D riantuannak lei ah khan riantuantu an chambau deuh caah a si i a cozah, chawlehnak lei ah budget zong hi a thar in tuah a duh si lai, a hlei in a biapi mi cu mah khuakhannak chung ah hin ralzaam pawl an i tel ve lo, tiah kan theih.
