Malaysia ram ah phungning lo in nan um ti ruang ah Chinmi tampi tel in Myanmar rammi 400 hrawng tlaihkhih an tong, tiah Chin ralzaam a bawmtu Alliance of Chin Refugees (ACR) sin in theih a si.
Malaysia ram, Kuala Lumpur, Cameron Highlands, Penang, Johor, Shah Alam le Jalan Alor tibantuk pawl ah thla khat chung ah Myanmar rammi 400 hrawng tlaih an ton hi a si.
ACR Chairman James Bawi Thang Bik nih, “Atulio cu Chin ralzaam hna ca ah a harsa ngai. Aruang cu US zong nih a policy a thlen. UNHCR haotu zong aa thleng fawn. Malaysia nih Asia chairman a tlaih fawn. Atu bantuk in i thlennawnnak caan lio ah hin tlaihkhih hi a um zungzal,” tiah Khonumthung ah a chim.
Malaysia ah ahlan nakin tlaihkhihnak faak khun in an tuah i, ramdangmi pawl an len tawnnak Jalan Alor tiang ah tlaihkhihnak a um, tiah theih a si.
Malaysia ram ah hin Chin miphun 80,000 hrawng an um i, hi chung ah hin UN card aa tlaih mi 20,000 fai lawng an si card a ngei lo mi tampi an um, tiah theih a si.
