Malaysia ram ah inn dot 9 sang in a tla i a nunnak a liam mi Mai Sui Hlei Tial, a ruak lamkam ah an phumter mi hna kong he pehtlai in, Chin Ramkulh Cozah aiawh in Minister Pu Soe Htet, Upadi Choh Pu Sonny Thang Cung, Chin Ramkulh Uknak Bawizik U Toe Win le Ramkulh Palek Bawizik hna nih tonnak an ngei tiah thawng kan theih.
Ramkulh Cozah nih hi kong he pehtlai in an va ton hna nak ah TYA/TSC le Khuanu Khuapa hna zong an i tel i, thil phunthum an hal hna tiah thawng kan theih.
Cozah lei nih an ton mi hna kong he pehtlai in, TYA chungtel Salai Elvis nih, “Kanmah lei kap in, hi kongkau ah mizapi lei teltumnak in zalong mi hlathlai phu dirh i hmuhchuahmi fiannak le dantatnak ngeih ding, Peng huap COVID-19 Committee ah khuami telh ding le hi hnu ah hi bantuk a um lo nakding le COVID-19 zulh phung he aa tlak in aho mithi zong, thlaanhmun te ah i vui khawh nakhnga tawlrelpiak ding timi phunthum kan hal hna. Hi phunthum hi hmaizarh chung tal ahkhin cun Cozah lei nih cathanh an kan chuahpiak te ko lai ti kan zumh. Ca an chuah mi ning zoh in kan cawlcang te lai,” tiah The Hakha Post ah a chim.
Cozah lei an halmi hna kong he pehtlai in phun hnih cu Cozah lei zong nih kan tawlrelpiak hna lai tiah Chin Ramkulh Municipal and Electric Minister Pu Soe Htet nih a chim.
“Mino lei nih hi kong ah a kan hal mi phunthum a um. An kan halmi chung in, a pahnihnak COVID-19 Committee ah Chinmi itel ding in kan tawlrelpiak than hna lai. Cun, a pathumnak a kan hal mi zong hi kan tawlrelpiak hna lai. Kanmah lei kap nih tha tein ca zong kan chuahpiak than hna lai. A pakhatnak an kan hal mi tu hi cu harnak a um bantuk in buainak zong a chuak kho mi dirhmun a si. Rakhine ram zong ah atu bantuk in an kan hal mi an tuah i buainak zong a um ca ah hihi cu a har ko,” tiah The Hakha Post ah a chim.
Mai Sui Hlei Tial a thihnak kong he pehtlai in Chin Zatlang Phu phu 13 hna zong nih lungtlin lonak le duh lonak cathanh October 7 zaan ah an chuah tiah theih a si.
Cun, atu bantuk in lamkam ah ruak phuumter mi kong ah rian ngei upa hna dantat ding le tat lo ding kong ah Chin Ramkulh, Upadi Choh Pu Sonny Thang Cung nih, “Hmasa bik ah chungkhar lei an tuar ning hi ka theihthiam tuk hna. Hi thil cang he pehtlai in Thantlang ah kan kal. Mino lei zong nih tuahpiak ding in a kan hal mi a um. A kan halmi chung ah tuah awk a tlak mi le tlak lomi zong a um. Cozah riantuan mi hna ca ah zulhphung zong tampi a um ve. Cozah riantuan pakhat dantat ding timi ahhin an tuahser ning hi tha tein zohpiak hmasa a hau. Zulhphung serpiak mi leeng in an tuah maw tuah lo timi zong hi zoh hnu ah tuah hmasa a hau. Keimah leikap tu nih cun buainak zeihmanh um loin tawlrel kan duh ko,” tiah a chim.
