Malaysia ah a nunnak a liam i, Cozah le taanzung lungtlin pinak in Myanmar ram lei ah a ruak an rak tlun pi i, Thantlang COVID-19 runvennak lei rian ngeitu hna nih luhter an duh lomi Mai Sui Hlei Tial cu 2020 October 6 suimilaam 9:00PM tluk ah a ruak an laak than i, thlaan ah an thial than cang tiah thawng kan theih.
Mai SuI Hlei Tial hi Thantlang Peng, Lungler khuami Pu Thang Kar le Tlangte khuami Pi Tluang Zi hna i an fanu a si. 2020 September 29 zaan ahkhan Malaysia a umnak inn dot 9 sang mi cung in a tla i atu bantuk in a nunnak a liam hi a si.
Mai Sui Hlei Tial a ruak an thial than mi kong he pehtlai in a pi a si mi Pi Dawt Hlem Sung nih, “Kan fa nute a ruak an laak than ding kong ah kanmah chung lei in Kap Tir Thang le upa dangdang nih rian ngei sin ah an va nawl hna. A ruak hi laak than ding ah nawl cu an pek hna nain, zaan ah a thli in an kan laakter. A ruak a laa tu zong hi a ruak an rak tlunpi i a phuumtu Quarantine ah an chiah mi minung pathum kha an si. Suimilaam 9:00PM tluk ah ruak laak than cu an i thok i suimilaam 3:00AM hrawng ah thlaan lei ah kan thial khawh than,” tiah The Hakha Post ah a chim.
A ruak an laak than mi cu, October 7 zinglei suimilaam 3:00 tluk ah Thantlang No.2 thlaan hmun ah a thar in a ruak an vui than cang tiah thawng kan theih.
Cun, Thantlang ah a ruak luhpi duh lomi kong he pehtlai in Thantlang Sipin Chairman Pu Ram Khar nih, “Tutan kan nau nu Sui Hlei Tial thihnak kong ah hin Thantlang Khuanu Khuapa, khua upa, TCF, Mino Bu, Pastor te ruahnak hal a um lo. Chim mi zong zei san a tlai lo. A poi kan ti cio. Thantlang khuapi kan thluachuah a pit lai ti zong kan phaang. Kan lung a tha hrimhrim lo, Tantak mi chungkhar dihlak tu hi Thantlang khuapi kan ngaithiam hram uh tiah khuapi nih kan nawl hna ding a si,” tiah a Facebook cahmai ah a langhter.
Atu bantuk in a hramthok ah Thantlang chung luhpi an duh lomi hi, COVID-19 runvennak ca ah a si tiah rian ngeitu hna sin in theih a si.
A ruak zaan ah an laakter mi hna kong he pehtlai in a ruak phurhnak le laak ding ah a tawlrel tu Pu Kap Tir Thang nih, “A ruak laak than ding in Khuanu Khuapa pawl he nawl nak kan va tuah. COVID-19 runvennak ca ah tiin minung pali nga te lawng nih nan laak than lai an kan ti. Cun, kanmah lei zong nih kan fa nute lamkam i phuum ding cu kan duh ve lo ca ah nawl an chuah ning tein kan va laak ve. A ruak kan laak ahhin aa-mah-khan in kan va laak,” tiah The Hakha Post ah a chim.
A ruak an laak than hnu ah Mai Sui Hlei Tial ruak cu khuachung in luhpi si loin, khuapi heelnak lam in an kalpi i thlaan ah a ruak an vui tiah thawng kan theih.
