Ralkap uknak a dih hnu ah mahte khuakhan lairelnak tling khitkhet te in a ngei mi ramkulh hna fonh in Federal Democracy ramkomh kan ser lai, tiah CNF (Chin), KNPP (Karenni), KNU (Karen) le NUG nih cathanh an chuah.
“Ralkap uknak dihdongh ding in le Federal Democracy ramkomh ser ding in hmun khat ah ral a do mi bu hna nih kan dirhmun kan langhter,” tiah CNF, KNPP, KNU le NUG nih nihin January 31 ah cathanh an chuah hi a si.
An cathanh ah ramkhel hmuitinh paruk (Six Political Objectives) an langhter: (1) Ralkap nih uknak a laak mi dihdonghter i Myanmar ramkhel rian ah ralkap telter ti lo ding, (2) Democracy phungning te in thim mi cozah tang ah hriamtlai vialte chiah ding, (3) 2008 Phunghrampi hrawh cikcek ding le nunter than ding in aa zuamtu pawl doh ding, (4) Zapi cohlan khawh mi Federal Democracy phunghrampi ser ding, (5) Cu phunghrampi ning cun Federal Democracy ramkomh ser ding, (6) Ram buai caan chung ah sualnak ngei lo in mi kut a tuar mi (pumpak/bu) hna nih dinnak (Justice) an hmuh khawh nakhnga tawlrel ding, ti hna hi an si.
A cunglei tinh mi paruk a tlamtlin nakhnga rianṭuan ningcang a dotdot zong in an langhter.
Cu chung ah aa tel mi cu “Myanmar ralkap nih a cunglei i ramkhel hmuitinh paruk hi tling khitkhet te in an cohlan khawh lawng ah anmah he biaruahnak kan ngei lai,” tiah CNF, KNPP, KNU le NUG nih an langhter.
