Chin Ramkulh Cozah nih pupa ram le vawlei an tawlrel mi kong ah Lothlo Bu hruainak in January 25 ah duhlonak lam an zawh mi hi a ngaingai cu a si khawh chung in kan tawlrel cuahmah lio ah atu bantuk in lam an zawh hi a si, tiah Chin Ramkulh Cozah Sipin Minister nih a chim.
“A ngaingai cu town plan kong ah Nay Pyi Taw in thiamsang zong kan sawm hna. Thla hnih tal cu a rau rih ding kan si. Aho loram dah kan hrawhpiak hna, tiah cazin kan laak cuahmah lio a si. Kan liamh hrimhrim hna lai. Ahohmanh sung hna hlah seh, tiah rian kan tuan cuahmah. Hi kong ah anmah loram ngei pawl zong voi thum kan ton ko hna nain atu bantuk in lam an zawh thiamthiam i kan lau ngai ko. Amah belte, kan daihter lai lo. A si khawh chung in kan tawlrelpiak ko hna lai. Liam a herh mi zong kan liam ko lai,” tiah Chin Ramkulh Cozah Sipin Minister le Chimphuannak Nawlngeitu U Soe Htet nih The Hakha Post ah a chim.
Duhlonak lam a zawh mi hna nih an au mi le cataar an thlir mi cu; Upadi nawlngeihnak um ding, Tlangcungmi lothlo hna covo kilven ding, Lothlo hna nunning thanchoter ding, Chin Ramkulh Cozah nih Myanmar ram Cozah i a fehter mi vawlei kong upadi kha tlamtling tein zulh le hman ding, Ningcang loin vawlei chuh mi pawl cu vawlei a ngeitu sin ah pek than ding, pupa vawlei le lothlo hna vawlei kilven ding, Chin Ramkulh chung um ziknawh le eihmuar a hmang mi Cozah riantuantu hloh ding, Chin Ramkulh chung i vawlei buaibainak kong tawlrel tik ah Chin nunphung cu upat in hman ding, fianhlannak a um lo mi khuapi sersiamnak kan herh lo, cun, Myanmar ram Ruahnakpetu Daw Aung San Suu Kyi hmai vial ahcun kan tuah lai ti tung i a hnulei ah tuah mi um lo le tuah khawh lo, tibantuk pawl an si.
Hi duhlonak lamzawh cu January 25 ah minung 160 hrawng nih lam an zawh. Chin Ramkulh Cozah zong nih a si khawh chung in tawlrelpiak ding in a timhtuah, tiah kan theih.
