Karenni ramkulh, Loikaw khualipi ah a um mi SAC ralhraang hna cu Karenni ralkap nih an chim hna i SAC Tatmah-66 kut tang ralkap 110 leng an thi, a taang mi chung in 32 nih hriamnam an chiah tiah KNDF nih nihin November 15 ah a thanh.
Karenni ramkulh “Operation 11.11” ni thumnak le ni linak ah KNDF nih Loikaw Sianghleirun kulh chung ah a um mi Tatmah-66 kut tang LIB-425 le LIB-6 cu an chim hna. November 13 ah LIB-425 battalion commander le commander changtu tel in an battalion ning dengmang in an thi, LIB-6 battalion in a cheu tluk an thi tiah an langhter.
November 14 ah Loikaw Sianghleirun kulh chung ah a taang mi LIB-6 ralkap pawl cu hriamnam chiah ding in caan kan pek hna i Captain Kaung Myat Ko hruai mi SAC ralkap 32 nih hriamnam an chiah ti zong an langhter.
Loikaw Sianghleirun kahdohnak ah SAC ralhraang battalion pahnih in battalion commander, battalion commander changtu hna tel in 110 leng an thi, 38 an tlaih hna, hriamnam phun tling zun 128 le kuanzen tampi an laak tiah theih a si.
Photo: KNDF
