Gangaw lei in Chinram a rak kai mi SAC ralhraang Tatmah – 77 le Chinland ralkap pawl kar kahdohnak a fah caah ralhraang pawl bawmh ding le, kahdohnak hma pu pawl laak ding ah SAC Helicopter a rak kai i, Hakha Peng Leium khua ah a tum tiah theih a si.
Tatmah – 77 ralhraang pawl cu SAC nih aa bochan taktak mi le aa zohthla taktak mi an si ti a si. SAC ralhraang pawl cu Chinland ralkap hna nih ni fatin an kah ve hna caah hliam tuar le a thi mi an tam tiah theih a si. Asinain a thi mi le hma pu zeizat set an si tu cu fehter khawh a si rih lo.
Hi kong he pehtlai in raalram um pakhat nih, “Tu tan Gangaw lei in a rak kai mi hi an tam ngai. Kan ram an phak hlan in PDF zong nih an doh hna, an kah hna. Kan ram an phak in kanmah nih ni fatin din lo in kan kah ve hna i hliam tuar le kan thah khawh mi zong an tam ve,” tiah THP ah a chim.
Gangaw lei in a rak kai mi SAC ralhraang hna nih anmah lawng in an pah khawh ti lo ca ah Hakha hrambunh 266 ralhraang battalion zong nih an va don hna tiah kan theih.
Nihin tiang ah Gangaw lei in a rak kai mi SAC ralhraang le Chinland ralkap hna kar kahdohnak ah CNA ralkap minung pahnih nih ram le miphun ca ah nunnak an pek cang i hma a pu mi tu cu an um hraw rih lo tiah kan theih.
Photo: The Hakha Post (CNA ralkap pawl hmanthlak)
