Ruah a tam caah Rezua le Gangaw karlak motor lampi ah vawlei a cim i thilphortu motor pawl a hren hna, tiah thawng kan theih.
May 24 thawk khan ruahsur hram a thawk i, Gangaw-Rezua pehtlaihnak motor lampi meng 46 zawn ah vawlei cimhnak a chuah hi a si.
Tualchungmi pakhat nih, “Lam cunglei i lung pawl le vawlei pawl an rak tla lengmang. Zeiti hmanh in kal khawh a si lo. Motorcycle zong in kal khawh a si lo. Ruah hi ni thum chung pehzul in a sur caah vawlei a cimh hi a si,” tiah a chim.
Gangaw-Rezua lampi hi Fur, Thaal le Khuasik zong ah kal khawh peng ding in Chinland Cozah nih a remh cuahmah lio zong a si, tiah Chinland Cozah, Ministry of Construction nih a langhter.
Gangaw-Rezua lampi hi Furpi ah cun kumtinte lam rawhnak a chuah pengnak a si i, kan hnu 2023 zong ah khan vawlei cimhnak a rak chuah caah thla 2 chung hrawng lam a rak pit, tiah theih a si.
