Mizoram, Lawngtlai in Paletwa lei ah Petrol, Diesel le eidin tirawl phorh an phih caah Rakhine mizapi nih harnak an tong thluahmah cang, tiah Rakhine tualchung thawngzamhnak DMG nih nihin July 13 ah a ṭial.
Rakhine hriamtlai AA nih Chinram ah lut in Chin mipi cung ah nuhrin covo buarnak a tuah lawng si lo in Chinmi le Chinmi karlak kahdohnak ah hruaitu dirhmun in a um ruang ah Lawngtlai Lai mino bu Central Young Lai Association (CYLA) nih June 24 thawk khan Lawngtlai-Paletwa lei thilri phorh a phih.
Lawngtlai in Paletwa lei ah an luhpi mi thilri pawl cu AA hriamtlai nih Chin miphun kahdohnak lila ah a hman caah cucu kan cohlang kho lo, tiah CYLA nih a rak langhter cang.
CYLA nih Paletwa lei thilri phorh a phihnak ni 20 a si cang bang in Rakhine ramchung ah Diesel, Petrol le eidin tirawl lei harsatnak an tong thluahmah cang i, thilman zong ni khat hnu nikhat in a kai tiah tualchungmi nih an chim.
Rakhine chawletthaltu pakhat nih, “India lei lawng in thilri laaknak kan ngei. Atu ah hi lam a pih tik ah cun harnak kan tong cang hna. Thilri a luh ti lo tik ah nikhat hnu nikhat in thilman zong a kai. A rauh deuh a si ahcun hinakhin a zual te lai,” tiah DMG ah a chim.
Atulio Rakhine ramchung ah chiti liter 20 tlum ṭin khat ah 260,000 MMK, Piat cuai khat ah 30,000 MMK, Khachuan cuai khat ah 50,000 MMK tiang a phan i a dangdang thilman zong a let in an kai cang, tiah a chim chap.
Atu Rakhine chaklei hmunram ah an hman mi Petrol, Diesel le eidin tirawl pawl hi Lawngtlai in Paletwa ah an luhpi hnu ah Kyaukdaw ah an lanhpi mi an si.
Butidaung peng khuasa nu pakhat nih, “Thilri cawk awk a um ti lo. Kyaukdaw zong ah a um ti lo. Kan khua ah a um mi thilri zong hi thaizing cun an dih cang lai. Thilri cawk awk um lo in a dih ahcun zeidah kan ei ti lai,” tiah a chim.
Kyaukdaw khuasa chawletthaltu pakhat nih, “Thil sining a zual hlan ah lam hi kan honpiak hna sehlaw kan duh ko,” tiah a chim.
Mizoram chung ah Rakhine chawletthaltu cheukhat zong chuak kho lo in an i hreng i, micheukhat cu thlerhkhawn zong an tong, tiah DMG nih cun a ṭial chih.
Rakhine ramkulh ah thilri luh khawh lo ding in SAC ralkap nih a luancia thla 8 hrawng khan lam a phih cang i, atu ah Mizoram lei in lam a pih chap tik ah Rakhine mizapi cu nikhat hnu nikhat in harsatnak an tong chin thluahmah cang, tiah DMG nih a langhter.
