Shan ramkulh, Laukkai khua SAC ralkap thong hnih leng nih hriamnam an chiah caah Kokang hmunram, Laukkai pumpi ning in SAC an um ti lo nak hmun a si cang tiah Chaklei Unau Thum Phu nih an thanh.
Nizan December 5 ah Kokong hmunram, Laukkai khua ah hram a bunh mi Regional Operations Command – ROC hmunpi tel in kiangkap um SAC ralkap battalion dihlak nih hriamnam an chiah mi a si.
Laukkai ROC in Brigadier rank SAC ralbawi paruk le Unau Thum Phu in ralbawi pawl Laukkai khua ah zanriah an i hrawmnak hmanthlak zong social media ah a hung thang.
December 5 ah Laukkai ROC le kiangkap ralkap 2,100 leng, an chungkhar hna le SAC kuttang zung riantuan Non-CDMers an dihlak minung 4,000 deng nih hriamnam chiah in an i ap i, an kal duhnak hmun ah Unau Thum Phu nih an thlah hna tiah an rak thanh.
