Shan ramkulh, Laukkai khuapi ah SAC ralkap 2,000 leng nih Kokang hriamtlai MNDAA sin ah hriam an chiah, tiah theih a si.
Hriam a chia mi SAC ralkap hi an zapi ah 2,123 an si i, SAC kut tang ah zung rian a ttuan mi (Non-CDM) 1,601 zong nih MNDAA kut ah an i ap. MNDAA kut ah aa ap mi SAC ralkap, Pyitusit le Non-CDM an zapi ah 3,724 an si.
MNDAA kut ah aa ap mi hna cu anmah duhnak hmun ah an kal khawh nakhnga an tawlrelpiak cuahmah hna lio a si.
Laukkai khuapi ah hin Kokang hmunram a kilvengtu SAC ralkap Headquarters, Regional Operations Command-ROC (Dah-Kah-Sah) timi a um i, MNDAA nih cu Headquarters cu an lak cang caah Shan ramkulh chung i Kokang hmunram hi MNDAA kut chung ah a um cang.
Laukkai khua laknak ah hin MNDAA nih SAC ralkap meithal zun 2,000 leng le a dangdang ralhriam tampi an laak, tiah theih a si.
