Nihin July 3 zinglei ah Shanram chaklei, Lasho khuapi chung ah hriampi a tlak caah tualchungmi 5 an thi, tiah theih a si.
Zinglei sml.4:00 hrawng ah Lasho khuahriang ah a um mi SAC ralkap sakhaan pawl cu Northern Alliance (AA, MNDAA, TNLA) nih an doh hna i, kap hnih kahdohnak faak ngai in a chuak.
Kap hnih kahdohnak in an kah mi hriampi cu nihin zinglei sml. 9:00 hrawng ah Lasho khua, No. 1 sang, Thayar lam ah a tla i chungkhar pakhat a si mi minung 5 an thih hi a si.
Tualchungmi pakhat nih, “SAC ralkap nih nizaan thawk khan pehtlai in hriampi an kah. Inn zong a tlerh dih. An kah mi hriampi pakhat sang chung ah a tlak caah innchungkhat khat in munung 5 an thi. Atu zong hi hriampi an kah peng ko,” tiah a chim.
Lasho khuahriang lei ah kahdohnak a um caah khuachung ah michawklet an tlawm ngaingai cang i, mi tampi cu ralzaam ding in an i tim hna tiah theih a si.
