Nizan January 7, zaan suimilaam 9:30 ah SAC nih vanlawng in Lashio peng, Maiyaw khuate ah bomb a thlak i khuami nu pali an thi tiah TNLA nih tu zing ah a thanh.
Maiyaw khuate ah kahdohnak zei hmanh a um lo nain SAC nih khuami tinhchih in pound 500 bomb a thlak hnawh hna. Khuachung minung umnak inn ah a tla i a puak tiah an langhter.
SAC ralhraang vanlawng bomb thlak mi ruang ah Maiyaw khuami nu pali an thi i inn 20 a rawk tiah theih a si.
SAC nih raldohnak he aa pehtlai lo mi khuami pawl cu tinh ciammam tein a kah hna i sualnak ngei lo khuami zong ningcang lo in a tlaih peng rih hna tiah TNLA thawngthanh ah an tial.
Nizan thiamthiam ah, Namhsan peng, Myothit khuate sianginn cu SAC nih zanlei suimilaam 2:35 ah Jet Fighter in bomb a thlak hna. Siang cachim sayamah pathum tel in khuami panga an thi, paruk hma faak an pu i inn 7 a rawk tiah theih a si.
Photo: PSLF/TNLA
