Thla khat fai a raumi Shanram chaklei Lashio khua kahdohnak ah sualnak ngei lo tualchungmi 133 an thi cang tiah Ta’ang hriamtlai TNLA nih July 31 ah theihternak a tuah.
Ni 36 a rau cangmi Lashio khuachung kahdohnak ah tualchungmi 133 an thih hi a si i, hliamhma a pumi minung 170 an um bang in fimcawnnak sianginn le a dangdang innlo tampi zong an rawkral.
Lashio khuachung ah mi bawmhnak rian a ṭuanmi pa pakhat nih, “Miruak kan char kho dih rih lo. Kanmah mi bawmtu bu chungtel lak ah hliamhma a pumi zong kan um,” tiah RFA ah a chim.
Lashio khua hmun tam deuh cu kan laak cang tiah Kokang hriamtlai MNDAA nih video he thawngthanhnak an tuah nain SAC nih Lashio khua kan sung rih lo, tiah an chim ve.
SAC ralkap nih Lashio khua cu nitin ti awk in vanlawng in bomb a thlak lengmang caah tualchungmi a thimi an karh i, innlo tampi zong an rawk cang, tiah theih a si.
