Ralkap uk kan duh lo ti langhternak ca ah Myanmar ram huap in lamzawh le a dangdang cawlcanghnak tuah a si bantuk in tlaih le khih zong tampi a chuak, hi chung ah Chin Ramkulh chung in tlaihkhih a tong mi minung panga an si i, pahnih cu February 28 ah an thlah than cang hna tiah theih a si.
Atu an tlaih mi hna hi Falam in minung pathum Salai Bawi Hlei Cung, Kyaw Kyaw le Pa Van hna an si. February 27 Hakha i tlaih a tongmi The Hakha Times CEO Pa Pui le Hakha khuathar Methodist Church Pastor Rev. Ngun Tum Lian hna cu February 28 ni ah an thlah colh hna.
Falam i an tlaih mi hna kong he pehtlai in min langhter duh lo pakhat nih, “February 28 ah Falam in tlaih a tongmi minung pathum an si. An tlaih hna le cangka in Falam ralkap sakhan ah an kuat colh hna. Thlahpiak than colh ding in pastor le rianngei hna nih nawlpat an si nain, nihin tiang ahcun thlah ding dirhmun an si rih lo. Pehzulh in nawlpat le rianngeitu hna he bia i ruah ding a si rih. Ralkap lei rianngei hna zong atu tlaih a tongmi kan naule hi tha tein zohkhenhpiak ding in kan chawnh hna. Thlah cu an thlah than te hrimhrim ko hna lai,” tiah The Hakha Post ah a chim.
Hakha ah tlaih a tong i an thlah than mi hna zong hi Hakha Christian Ministers Fellowship le mino hna tawlrelnak in a chuak mi an si i, biakamnak zong an tuahter hna tiah theih a si.
