KIO/KIA Headquarters a umnak Laiza khuapi a him nakding ca ah a biapi ngai mi Kharataung SAC ralkap sakhaan cu nihin March 9 ah KIA nih tlamtling te in a laak khawh cang, tiah theih a si.
Laiza kiangkap ah a um mi SAC ralkap sakhaan pawl cu March 7 thawk in KIA nih doh hram an thawk i zinglei ah Laiza he a naih biknak ah a um mi Kasanbum SAC ralkap sakhaan cu KIA nih an laak khawh.
Kasanbum SAC ralkap sakhaan an laak hnu zaanlei sml. 2:00 hrawng ah Kharataung SAC ralkap sakhaan cu KIA nih pehzul in an hun laak khawh hi a si.
KIA chimnak nawlngei Colonel Naw Bu nih, “Nihin zaanlei sml. 2:00 hrawng ah Laiza ca ah a biapi ngai mi Kharataung SAC ralkap sakhaan cu kan laak khawh,” tiah People’s Spring ah a fehter.
Hi Kharataung SAC ralkap sakhaan in hin Laiza lei ah SAC ralkap pawl nih kumtinte hriam ngan a kah lengmang caah hi sakhaan hi Laiza himnak ca ah a biapi ngai mi a si.
March 7 thawk in Kachin ramkulh chung ah a um mi SAC ralkap sakhaan tampi cu KIA le Kachin PDF pawl i bawm in doh hram an thawk i nihin March 9 tiang ah SAC ralkap sakhaan 16 an laak cang, tiah theih a si.
