Chin ramkulh lamsul lei Minister Pu Sui Thio tel in Japan Airline lei thiamsang a cawng mi minung 2 hna nih Falam peng Laiva Dam le Falam Surbung Airport zohfelnak an ngei tiah kan theih.
Hi kong he pehtlai in Minister Pu Sui Thio nih, “Atu zohfelnak a rak tuahtu hna hi Japan i Airline lei Strengthening of Civil Aviation Safety Oversight in Republic of the Union of Myanmar Project in Akira HAHRDA hruai mi an si. Kanmah Chin ramkulh cozah lei in keimah le Falam peng penguk bawi Pu Cia Awi nih kan zulh hna. Atu Falam Surbung Airport khi an lung a tling deuh lo, an duh ning a si deuh lo. A si nain vanlong tu cu a tum thiam ko lai. Atu hi tlang zong cu kan chimh khawh dih rih lo ca ah an lungduh a si lo mi hi a si,” tiah The Hakha Post ah a chim.
Falam Surbung Airport hi Falam khua in meng 8 a hlatnak hmun ah a um mi a si i, Myanmar kyats 34.19 Billion dih in tuah an timh mi a si. Vanlong tliknak lam hi a sau pe 6000 Flexible Pavement phun in tuah mi a si. Over Run hi a sau pe 200, a kauh pe 100 a si i, vanlong dinhnak a sau pe 250 le a kauh pe 250 in an tuah.
Cun, “Japan lei Strengthening of Civil Aviation Safety Oversight in Republic of the Union of Myanmar Project in Akira HAHRDA nih atu an tuah cuahmah mi Laiva Dam (DSc2) le hlan i a rak um cia mi Laiva Dam an va zoh i , rian ngei upa nih chimfiannak a tuah. Anmah leikap in zeidang an chim mi tu cu a um lo. Laiva Dam dinti hi a hman cu kan hman cang nain hon ni (Open Ceremony) tu cu kan tuah rih lo. Chief Minister aa manh tik ah amah nih a tuah te lai. Falam khuapi chung sang 4 chung ah ti kan pek cang. Ti tha a thawn tuk tik ah suimilaam 24 chung hi cu kan pe ngam rih hna lo. Aruang cu pipe kan hman mi hi phun thatha taktak pawl a si lo. Atu zong hi sang dang ah pek ding in timhlamhnak kan ngeih lio a si” tiah Falam Sipin Lutlai Pu Dar Lian Uk nih The Hakha Post ah a chim.
Falam khuapi din ti ca ah an lak mi Laiva Dam tuahnak ding ca ah Myanmar ram President ca ah hman khawh ding in cozah nih a khiahpiak mi kyat 5 Billion dih in Authentic Company nih an tuan i, Falam khua chung sang thar an samh mi ah siseh, sang hlun ah siseh ti Golan 10000 tlum ti inn hmun 7 ah an chiah piak hna.
photo/ IPRD Falam, Salai Tluangte
