Thantlang khuachung i hmun rem ngaingai ah a ummi SAC ralkap hmunkhuarnak Lai Villa khualbuk cu nizaan September 17 zaanlei ah Chinland Cozah ralkap nih an laak khawh i, kahdohnak ah SAC ralkap pasarih an thi, tiah CDF-Thantlang ṭuanvo ngeitu pakhat nih a chim.
CDF-Thantlang ṭuanvo ngeitu pakhat nih, “Thantlang khuachung ah SAC ralkap hmunkhuarnak pali a um i cu chung ah cun Lai Villa cu nizaan zaanlei kan laak. SAC ralkap pasarih hrawng an thi. Hliamhma a pumi zong an um,” tiah Khit Thit Media sin ah a chim.
Lai Villa laak kahdohnak ah Chinland Cozah ralkap bu 15 hrawng an i tel i, SAC ralkap hriamnam pawl zong an laak khawh, tiah a chim chap.
September 16 ah khan Lai Villa ah hmun a khuarmi SAC ralkap le palek chung in palek pathum cu hriamnam he Chinland Cozah ralkap sin ah an rak zaam.
SAC palek pathum an zaam hnu September 17 zaanlei sml. 4:00 tluk ah Chinland Cozah ralkap hna nih Lai Villa cu tlamtling tein an laak khawh hi a si.
July 22 in an rak thawkmi Tilim Operation cu atu ah cun thla hnih dengmang a rau cang i, Chinland Cozah ralkap nih Hakha-Thantlang karlak i lungkhar sakhaan le Auto sakhaan pawl an laak khawh cang pin ah Thantlang khua i SAC ralkap sakhaanpi Kha-La-Ya 269 zong an laak, tiah theih a si.
