Laamtuk le Zokhua kar ah Caw a fir mi minung pakhat kan tlaih tiah Hakha Sakhaanhmu sin in August 10 ah kan theih.
Hakha Sakhaanhmu Myo Win Hlaing nih, “Laamtuk le Zokhua khua kar ah Caw a fir mi pa kan tlaih. Khuami nih thawng an kan thanh i kan va tlaih. Khuami nih an chimnak ahcun Laamtuk le Zokhua khua kar ah a tlong mi caw lakah Caw pakhat nam tein a ke ah a tuk i a thah. A sa zong Bungzung lei le kaa kip ah a zuar hna. Hi a rak fir i a thah hi thla hnih a rau cang. A ngeitu nih an hlat i atu ah an theih i thawng an kan thanh,” tiah The Hakha Post ah a chim.
“Kanmah nih kan va tlaih cang i atu sakhaan ah kan chiah ko. August 10, zaanlei suimilam 1:00 ah chek a si lai. Kan chek lai i a hman a si ko ahcun Phungrelnak 380/54 phung ning in dantat a si lai. A tu kan tlaih mi pa hi Gangaw khuami a si,” tiah The Hakha Post ah a chimchap.
Hi caw a fir mi pa cu a hlan zong ah Laamtuk le Zokhua khua hna i an caw zong a fir i Kalaymyo lei ah a sa zong a zuar bal cang mi a si tiah kan theih.
