SAC ralkap nih a tharchuah mi Myanmar rammi ralkap tlaknak upadi nih a huap mi mino pawl dohthlennak ah i tel ding in CNF/CNA nih forhfialnak ca a chuah.
Kum (76)nak Chin Miphun Ni kong he pehtlai in nihin February 15 ah CNF/CNA nih cathanh a chuah i, cu cathanh chung ah cun mino pawl dothlennak ah i tel ding in forhfial a tuah hi a si.
“SAC ralkap nih rammi pawl kha ralkhamnak phaw ah hman a duh hna caah atu bantuk in hramhram in ralkap thar a khawmhnak hi a si. Cucaah, ralkap tlaknak upadi (kum rikhiah) nih a huap mi mino pawl dothlennak ah i tel ding in kan in forhfial hna,” tiah CNF/CNA nih forhfialnak a tuah.
Chin Miphun Ni kong he pehtlai in CNF/CNA nih a chuah mi cathanh ah Chinram le Chin miphun sersiamnak rian ah Chin mipi i tel cio ding in forhfialnak zong a tuah.
Cu lawng si lo in dohthlennak ah nunnak, thisen le kut-ke a pe mi ralkap vialte upat peknak le dohthlennak caan chung ah harnak phunzakip a tuar mi Chin mipi tuarpinak zong cathanh ah an langhter chih.
