Kalay Pengkomh Biaceih zung nih kum tlinglo tlaihhremnak in kum 43 thong an thlak mi Pathian thawngtha chim Evan. Lar Boih cu Ramthen Biaceih Zung nih kum 17 lawng tla ding in a kum an tumhpiak ca ah Kalay hrambunh zatlang phu hna nih an duh lonak an langhter.
Kalay peng, nitlakchaklei Letpanchawng khua ah a ummi Evan. Lal Biak Lar cu kum 14 le kum 15 ngakchia nu pahnih hna cu a tlaihhrem hna ca ah Kalay Pengkomh Biaceih Zung nih 2019 January 19 ah kum 43 thong tla ding in biakhiahnak an rak tuah.
Hi kong he pehtlai in Kalay khuasa min langhter duh lomi pakhat nih, “Kalay Pengkomh Biaceih Zung nih Evan. Lar Boih hi a liamcia kum 2019 ah kum 43 thong tla ding in bia an rak chah nain Ramthen Biaceih Zung nih kum 17 lawng tla ding in a kum an thumhpiak than. Kum 17 tiang a kum an thumhpiak mi hi kanmah leikap in kan lung a tling hrimhrim lo. A zu-khan an tuah than ca ah Naypyidaw in ngakchia pahnih hna zong auh than an si. Hi bantuk in thil a can tik ah kanmah phu leikap in nu hna nih Ramthen Biaceih Zung sin ah an duh lonak kong, kum 43 hi si ko seh timi kong zong halnak an tuah,” tiah a chim.
Evan. Lar Boih tiah auh mi Lal Biak Lar hi a liamcia kum ah Falam in Letpanchawng an inn ah a um mi Mai…kum 15 le Mai…. kum 14 hna cu 2018 April thla ah a tlaihhrem hna tiah tlaihhrem a tong mi ngakchia hna i chungkhar nih 2018 April 13 ah taza an rak cuai.
Kalay hrambunh Dingdi Organization Chairman Pi Masawmi nih, “Atu bantuk in kum 43 in kum 17 ah an thumhpiak than mi hi cu ruah a phu ngai ko. Kanmah Dingdi Organization lei zong in hihi cu kan duh bak lo, kan duh hrimhrim lo. Kanmah lei zong nih a herh kan ti ning tiang kan tawlrel than ve lai,” tiah The Hakha Post ah a chim.
