Zapi dohthlennak kum 2 chungah SAC ralhraang he kahdohnak voi 9900 a chuak i, SAC ralhraang thong sawmthum hrawng an thi tiah National Unity Government (NUG) nih dohthlen kum hnih tlin report a chuah mi ah a langhter.
SAC nih ke ralkap Infantry Battalion 214 le Light Infantry Battalion 307 a ngeih hna i ral a tu kho mi 65,000 hrawng an si lai tiah ruahdamh a si. Van ralkap, ti ralkap, sehzung ralkap hna tel in SAC nih ralkap thazaang 225,000 – 240,000 hrawng a ngeih lai tiah zumh a si. Kum 2 chung raltuknak ah SAC ralhraang 30,000 tluk cu kan thah khawh cang hna. Kan raal pawl i an thazaang zatuak 12.5 tluk raalram ah an lotlau cang. Raalram ah a thi mi lawng siloin a zaam mi, raal doh duh lo ruang ah thong thlak a tong mi zong a thong in an um lai tiah NUG nih a langhter.
Kumhnih chung raldohnak ah an thazaang a zor ngai ti fiang tein hmuh khawh a si. An thazaang chap than nakding ah Pyusawhtee, Pyithusit, ramri hngak ralkap, ralkap pension le kumtling lo ralkap pawl an hman hna lawng siloin ralkap nupi hna le Non-CDM pawl tiang in hriamnam an tlaihter hna i raltuknak ah hman an timh hna ti zong an langhter.
Dohthlennak kum khatnak ah SAC ralkap, palek, BGF le Pyithusit camp 28 laak an si. A kum hnihnak ah SAC lei camp 107 laak an si.
Kum hnih chung raltuknak ah SAC ralhraang meithal hna lawng siloin 120MM, 81MM, 60MM le a dang hriam ngan phunphun laak a si. Sagaing ramthen Homalin peng Shwe Pyi Aye kahdohnak ah ralhraang Helicopter 1, Mese kahdohnak ah K-8 vanlawng pakhat hrawhpiak an si i Chin ramkulh ah tank 2 hrawh an si.
Kum hnih chungah Battalion ning in rammi lei ah aa thialmi an um, Karen ah SAC ramri hngak Battalion No. 1004 le 1005 cu rammi ralkap sinah an i fon. Nawlngeihnak laak a si hnu in rammi mizapi sinah aa thialmi SAC ralkap 3234, palek 10536, an dihlak 13771 an si cang. Chek cuahmah mi hna he fonh ahcun ralkap le palek dihlak 14000 leng rammi sin ah an i fon cang i, cu ah cun ralbawi tampi an i tel tiah NUG nih dohthlen kum hnih tlinnak report ah a langhter.
Photo: Chuncung kahdohnak ah Chin ralkap nih an hrawh mi SAC armored vehicle pahnih
