Chinland Defense Force-Hakha nih a luan cia kum hnih chung ah raal voi 166 a tuk i, cu raaltuknak hna ah SAC ralhraang 510 an thi i 222 hma an pu tiah CDF-Hakha nih nihin ah a thanh.
February 1, Pau Dohthlennak kum hnih tlin cathanh ah a langhter mi a si. Cu raaltuknak chung ah CDF-Hakha ralkap 19 nih ram le miphun ca ah an nunnak an pek i 41 hma an pu. Hakha khuapi chung ah kahdohnak voi 65 kan tuah cang ti zong a langhter.
Hakha peng chung ah, Ram le miphun luat nakding ca ah dohthlennak kan tuah i ralhraang uk duh lo langhter in lam a zawh mi minung 50,000 tluk kan rak si, zung riantuan 4,000 tluk nih CDM kan tuah, hriam tlaih in dohthlennak a tuah mi 3,000 tluk kan si, mizapi nih ralhraang cozah nawl an ngai duh lo. Hakha peng chung ah ralhraang nih zei hmanh an tuah kho lo. Hakha khuapi zong caan rau lo te ah kan laak khawh cang lai tiah cathanh ah an telh.
Kum hnih chung ah ralhraang kut in Hakha peng chung rammi 14 an thi i paruk hma an pu. 374 tlaihkhih an tong. Ralhraang nih inn 30 an khangh i inn 4 an hrawh.
Ralhraang uknak a hram in a cah hlan tiang pehzulh in dothlennak kan tuah lai. Mizapi nih mahle sikhawhnak cio in hi dothlennak ah i tel ding in kan in sawm hna tiah an thanh.
Photo: CDF-Hakha
