Kalay khuapi, Eindaing sang ah zeng zawtnak in caan saupi a zaw cang mi kum 91 upa pitar pakhat cu Chouh khuapi ah a ummi Zaw Myin Thun (kum 40) nih 2020 June 19 suimilaam 6:30PM tluk ah a tlaihhrem i pitar nu cu suimilaam 11:00PM tluk ah a nunnak a liam tiah thawng kan theih.
Hi tlaihhremnak kong he pehtlai in Dingdi Organization nu lei a cawlcang mi phu i rianngei pakhat nih, “A tlaihhrem ti thawng kan theih hnu ah kan va kal. A hmun kan va phak ahcun tlaihhrem a tong mi kan nu hi a therh in a rak therh cang. Cun, a taksa hi a duk in a duk dih. A nih hi holh cu a holh kho rih nain a hna a rak chet mi a si. Tlaihhrem tu pa nih a luh hnawh le luh hnawh lo hmanh a thei lo. A chung le hi coka ah an um. Pa nih a luhhnawh hnu in a au i a chung le nih an zuanhnawh colh ve. An au dih ca ah pawngkam minung nih an zuanhnawh cio hna i tlaihrem a hmang mi pa cu an tlaih,” tiah a chim.
Tlaihhrem hmang pa U Zaw Myin Tun cu Chouh Khuapi Palek nih an tlaih i sakhan ah an chiah tiah theih a si.
Cun, Kalay khuasa Myomin Htike timi pa nih tuzing suimilaam 7:00 ah, “U Zaw Myin Tun nih a tlaihhrem mi kan pi cu a tlaihhremnak ruang ah nizaan suimilaam 11:00PM sii-inn ah a nunnak a liam,” tiah a facebook cahmai ah a langhter.
