Myanmar rammi kum 35 in kum 65 karlak pa pohpoh sang le khuate runvengtu bu ah i tel ding in SAC nih nawl a chuah, tiah theih a si.
PDF le tlangcungmi hriamtlai pawl lehrul kho ding in SAC nih “Mizapi Runvengtu le Ralhrang Dohkalhtu Bu” timi bu thar a ser i, khuate le sang tiang in pyituhsit training tuah ding in timhtuahnak a ngei.
Naypyidaw thawngpang hram minung pakhat nih, “Myanmar ram huap in kum 35 in kum 65 karlak pa pohpoh mahle sang le khuate ah ralkap training kaiter an si lai. Atu ah kum 35 tang mino pawl cu thlatin in ralkap training kaiter an si cang. Kum 35 in kum 65 karlak pawl zong sang le khuate runvennak ah i tel ding in training pek an timh hna caah a si,” tiah Khit Thit Media ah a chim.
A dang thawngpang hram pakhat nih, “Sang pakhat ah minung pahra an auhnak zong a um i minung 20 an auhnak zong a um ve. Thayarwadi ah a ummi SAC ralkap sakhaan (Kha La Ya-35) ah thla khat chung training kaiter an timh hna,” tiah BBC ah a chim.
Myanmar sining a cuantu U Tann Soe Naing nih, “Shanram chaklei ah SAC ralkap pawl faak tuk in an sungh caah anmah SAC ralkap thazaang lawng in PDF le Tlangcungmi hriamtlai hi doh awk an ṭha lo timi ruahnak an ngei. Cucaah, mizapi zong runvennak ah telter ding in SAC nih timhtuahnak a ngeih caah a si,” tiah a chim.
