Dohthlennnak kum 4 chung ah CDF-Zophei in ralkap 16 nih ram le miphun ca ah an nunnak an pek, tiah CDF-Zophei runvennak lei Secretary Salai Benjamin nih a chim.
“Dohthlennak kan tuah thawk in nihin ni tiang ah CDF-Zophei ralkap nih ram le miphun ca ah an nunnak an pek cang. A dang ralkap 60 hrawng zong hi kutke tlamtling lo in an um,” tiah Salai Benjamin nih February 2 ah an tuah mi online biaruahnak ah a chim.
Dohthlennak hi nunnak thaap in tuah mi a si caah teinak hmuh lio caan nakin sunghzatlaknak ton lio caan ah hin thazaang i pek a herh deuh tawn, tiah a chim chap.
“Raldoh ti mi cu tei caan a um bang in sungh caan zong a um. Mizapi nih chawva in na kan dirkamh bang in kannih zong nih kan nunnak thaap in dohthlennak kan tuah ve. Teinak kan hmuh lio caan nakin sunghzatlak kan ton lio caan ah hin thazaang peknak le i hnemhnak hna hi kan herh deuh tawn,” tiah Salai Benjamin nih a chim chap.
Dohthlennak kum 4 chung ah Chinram ah minung 1,000 dengmang an nunnak a liam cang i, cu chung ah hin mizapi ralkap 474 an i tel, tiah Institute of Chin Affairs nih February 1 ah report a chuah.
