Dohthlennak kum li chung ah Chinland Defense Force – Thantlang (CDF-Thantlang) in ralkap 67 nih ram le miphun caah an nunnak an pek cang i, SAC ralkap kut in sualnak ngei lo khuami 17 nunnak a liam tiah theih a si.
Cucu, CDF-Thantlang dirhnak kum li tlin camtuak a si mi nihin, 2025 April 6 ah CDF-Thantlang nih cathanh a chuah i atu bantuk in an langhter mi a si.
“CDF-Thantlang nih Thantlang khuapi telh in Chinram chung um ralhraang sakhan laak khawh dih nakding siseh, ramkheel hmuitinh mi a tlamtlin khawh nakhnga dothlennak ṭuanṭi hawi bu hna he kutsih in kan ṭuahṭi rih lai. Chin miphun chung ah lungrualnak a len khawh nakhnga a si khawhchung in kan i zuam lai,” tiah cathanh ah an ṭial.
Dohthlennak rian a ṭhawn chin i hmual a ngeih deuh nakding ah CDF-Thantlang nih ralkap sersiamnak siseh, ukhruainak serchuahnak rian siseh, an kalpi cuahmahnak kong zong cathanh ah an langhter.
Photo: CDF-Thantlang
