Dothlennak kum 3 chung ah CDF-KKG in ralkap 46 nih ram le miphun ca ah an nunnak an pek i, a dang ralkap 11 cu pumtlinglo ah an i chuah, tiah theih a si.
CDF-KKG Global Support Team nih dohthlennak kum 3 chung ah ralram hliamhma put ruang ah pumtlinglo ah aa chuahmi CDF-KKG ralkap pawl kong video tawi cu August 13 ah a chuah i, atu bantuk in langhter hi a si.
CDF-KKG Battalion-5 i second battalion commander Aung Kyaw Kyaw nih, “Kan battalion chung zong ah hliamhma a pumi tampi kan um. A kut le a ke bulmi zong an um. Mizapi lei zong nih a si khawh chung in bawmhchanh kan zuam rih u ti hi nawl kan duh hna. Kannih dohthlengtu ralkap hna zong nih dohthlennak a dihdongh tiang ral kan do ve lai,” tiah a chim.
Aung Kyaw Kyaw zong hi Gangaw peng chung ralram hmun khat ah landmine nih a puah hnawh hna caah a kehlei mit a rawkmi a si.
CDF-KKG Battalion-6 ah Battalion Commander a simi Maung Thein nih, “Raldohnak ah a ke le a kut a bulmi kan ralkap pawl an um bang in a mit a rawkmi zong an um hna. Hi bantuk a tuarmi kan ralkap pawl an lung a ṭhawn khawh ṭhan nakhnga le a ngan a dam khawh nakhnga mizapi lei zong nih bawmh khawh rak kan zuampiak hram u,” tiah a chim.
CDF-KKG cu Kalay, Kabaw le Gangaw peng ah hmun a khuarmi Chin miphun dohthlengtu bu an si i, Chinram chung SAC sakhaan laak kahdohnak pawl ah Chinland Council ralkap bu hna he ral a doh cuahmahmi a si.
