Khuapau dohthlennak kum hnih chung ah ralkap council nih minung 3434 a thah cang hna tiah ramkheel thongtla bawmchantu phu AAPP nih nihin ah a thanh.
Cucu ralkap nih hramhram in uknak an laak hnu, 2021 February 1 in 2023 April 23 kar cazin a si tiah AAPP nih a thanh.
Ralkap nih uknak a laak hnu kum hnih leng chung ah minung 31,538 a tlaih hna i, cu chung ah minung 17,633 cu atu ah tlaihkhih a tong lio rih mi an si tiah an langhter.
Ralkap Council nih a tlaih mi hna lak ah 5,688 cu thong a thlak cang hna. Thah ding in thihdan pek mi minung 110 an si cang, a langhlat in thihdan pek mi 42 an um tiah an tial.
Ralhraang nih uknak an laak hnu in 2023 March 31 tiang ah democracy ca a cawlcaang mi pawl an ngeihchiah a chuh hna. Cu a chuh mi hna chung ah cun inn le ngeihchiah pical deuh 751 zong an i tel. Cucu hluttaw palai 300 tel in rammi minung 636 sin in a chuh mi hna an si tiah AAPP nih an langhter.
