Shan ramkulh chung i Kokang hmunram cu kum 14 hnu ah a zapi in kan lak khawh dih cang, tiah MNDAA nih nihin January 6 ah phungning in thawngthanhnak an tuah.
Laukkai khua ah a um mi Regional Operations Command – ROC (Dah-Kah-Sah) le Nan Htin Min tlang ah a ummi SAC ralkap pawl nih hriam an chiah hnu ah atu bantuk in MNDAA nih Kokang hmunram an lak dih hi a si.
“Kokang hmumram chung ah SAC ralkap pakhat hmanh an um ti lo kan ti khawh cang. January 4 ah khan Dah-Kah-Sah i SAC ralkap pawl nih MNDAA sin ah hriam an chiah. Hriam a chiami lak ah Brigadier General rank a simi minung 6, ralkap 2,100 leng le ralkap chungkhar 1,600 an i tel,” tiah MNDAA nih an langhter.
“Aluancia August 8, 2009 ah khan Kokang mahte uknak hmumram (Kokang Self-Admistered Zone-1) ah Kawl ralkap pawl an rak lut i, Kokang miphun hna i mahte uknak nawl cu hramhram in a rak kan chuh. Cu caan thawk cun Kokang hmunram ah mahte uknak hmunram dirh kho ṭhan ding in raldohnak lei le cabuai cung biaruahnak lei in kan rak i zuam. Kum 14 chung kan rak i zuamnak cu nihin ni ah teinak tuanbia thar kan ṭial khawh cang,” taih thawngthanhnak ah an langhter.
MNDAA, AA le TNLA nih Operation 1027 an tuahnak ni 71 a tlin ah MNDAA nih Kokang hmunram a zapi in an lak khawh hi a si.
MNDAA sin ah hriam a chiami SAC ralkap pawl le an chungkhar vialte an duhnak hmun ah an kal khawh nakhnga tawlrelpiak cuahmah an si, tiah thawngthanhnak ah an langhter chih.
