Karen National Union (KNU) Brigade-6 hmun i August thla chung kahdohnak a cang mi pawl ah SAC lei captain rank pathum tel in ralhraang 191 an thi tiah KNU, Dooplaya Distric nih a thanh.
August 1 in 31 tiang KNU Brigade-6 hmun chung ah KNLA, KNDO, hriamtlai phu komh hna le SAC ralhraang hna kar kahdohnak voi 70 a cang tiah theih a si.
Cu kahdohnak pawl ah cun SAC lei ah captain rank pathum, sen hnih pakhat, palek sen hnih pakhat tel in 191 an thi. Battalion Commander pakhat, Battalion Commander changtu pakhat tel in 163 hma an pu. SAC lei hman mi motor pakua zong an hrawh khawh tiah an langhter.
KNLA, KNDO le hriamtlai phu komh lei in 22 hma an pu i pasarih nunnak a liam tiah theih a si.
Ralhraang camp le raallam sial ah a rak lut mi SAC ralkap pawl cu KNLA, KNDO hriamtlai phu komh nih ni fatin an kah lengmang hna, drone zong in bomb an va thlak hna tiah an langhter.
Atu ah cun SAC ralkap pawl cu cunglei an bawi pawl nih rialchih in an uk hna caah an thinlung a zor ngai i, camp zaam taak in KNU le rammi ralkap hna sin ah a rak i fon mi an tampi. Cu bantuk in a rak i fon mi ralkap pawl cu KNU nih lunglawm tein kan doh hna i kan zohkhenh hna. An nun tunmer than khawh nakding zong kan tawlrelpiak hna. Hriamnam he an rak zaam ahcun a man tuak in bawmhnak kan pek hna tiah KNU, Dooplaya Distric nih an thanh.
Photo: KNU, Dooplaya Distric (Letkhat tlang laak than ding in a rak kai mi SAC ralkap he August 15 kahdohnak ah laak mi hriamnam kuanzen le KNLA – phu komh ralkap pawl)
