Karen ramkulh, KNU Brigade-5 hmunhma chung i September thla khat chung kahdohnak ah SAC ralhraang 39 an thi tiah, Mutraw pengkomh, Brigade-5 nih a thanh.
2023 September 1 in 30 tiang Mutraw pengkomh, No 5 Brigade hmunhma ah, KNLA le SAC ralhraang, BGF kar kahdohnak voi 84 a chuak. Hi kahdohnak hna ah SAC ralhraang 39 an thi, captain rank pahnih tel in 46 nih hliam an tuar tiah an tial.
KNLA lei in minung 5 nih ram ca ah an nunnak an pek i 13 nih hliam an tuar.
SAC ralhraang nih Jet Fighter in voi 10 kahdohnak a tuah hlei ah Pound 500 leng a rit mi cluster bomb 23 a thlak fawn. Miakpi zong voi 20 an kah tiah an langhter.
SAC ralhraang nih Hpapon khuami pakhat an thah, SAC kah mi miakpi kuan nih a khen ca ah sualnak ngei lo tarnu pakhat a nunnak a liam. SAC ralhraang nih Jet-Fighter in kahdohnak a tuah caah kum 15 tang siangngakchia minung 3 le sianginn Committe chungtel pakhat an nunnak a liam, siangngakchia, saya/mah le khuami minung 8 hliam an tuar. Biaknak lei inn pahnih, sianginn pakhat le inn 12 a rawk tiah an thanh.
