Tanintharyi ramṭhen, Thayetchaung peng ah a um mi Pedat SAC ralkap camp cu tu zing ah KNLA hruai mi ralkap phu komh nih an laak i SAC ralkap 20 leng a nung in an tlaih hna tiah theih a si.
Myeik-Dawei motor lam kam ah a um mi Pedat SAC ralkap camp cu May 5 thawk in dohthlengtu ralkap phu komh nih an kah i, nihin May 8 zinglei ah an laak khawh tiah kan theih.
“SAC ralkap 20 leng a nung in kan tlaih hna. A thi mi zong an tam. Hriamnam zong kan laak khawh hna. Phung ning in thanhnak kan tuah ṭhan te lai,” tiah Southern Command in ṭuanvo ngeitu nih a chim.
Kahdohnak ah dohthlengtu ralkap lei in a thi mi le hmapu zong an um tiah theih a si.
SAC nih vanlawng le tilawng in kahdohnak pehtlai in a tuah caah tualchung mi hna cu khua chuah taak in an zaam tiah theih a si.
